Do TJA îro SKM: Li dijî êrîşên divê piştevanî pêş bikeve

ÎZMÎR – Jinên ku bertek nîşanî binçavkirina siyastmedarên jin ê ESP û SKM’ê da wiha gotin:”Do TJA îro SKM. Li dijî êrîşên divê piştevanî pêş bikeve.”

Hevseroka ESP’ê Ozlem Gumuştaş, Berdevka SKM’ê Denîz Aktaş, endamên ESP SKM MYK’ê Çîmen Otlu, Satiye Ok, Ebru Yîgît, Zuleyha Mangan, Ezgî Bahçecî, Tanya Kara û hevseroka HDP’a Artemîtê Sevgî Ozdem bi hinceta li malê civîn kirine hatin binçavkirin. Jinan banga piştevaniya bi siyasetmedarên jin re kirin.

Berdevka Meclîsa Jinan a HDP’ê ya Îzmîrê Didar Gul diyar kir ku jinên ESP û SKM’î ne tenê ne û got: “AKP-MHP û şefê wan Erdogan dizane ku wê jin her tiştî biguherin. Ji ber vê jî êrîşê jinan dikin. Her ku ew êrîş dikin jin li qadan li dijî binçavkirin û êrîşan têdikoşin, têkoşînê mezin dikin. Operasyona îro ne ya ewil e û wê ne ya dawî be jî. Lê wateyek wê heye. Çawa îro li hember TJA’yê operasyon heye li hember ESP û SKM’ê yên pêkhateyên HDP’ê ne jî heye. Em carek din bang dikin. Jinên ESP û SKM’î ne tenê ne.”

Didarê destnîşan kir ku êrîşên li hember SKM’ê wê bi SKM’ê sînor nemîne, wê êrîş berfireh bibe û got: “Li dijî vê hewcedarî bi tevgereke jinan a çalak û ciwan heye. Em bang li hemû saziyan dikin. Divê em piştevaniya bi jinan re mezin bikin.”

Endama Jinên Ciwan a Azad Meryem Yildirim got SKM’iyên li dijî kampanya reşkirina Peymana Stenbolê û qetilkirina Pinar Gultekîn daketin kolanan hatine binçavkirin û got: “Li Balikesîrê 9 hevalên me hatin binçavkirin. Ev êrîş li hember hemû jinan hatine kirin. Em bang li hemû kesî dikin. Bila demildest hevalên me berdin.”

Ayşe Ozden ya SKM’î jî bi lêv kir ku divê jin demildest bên berdan û got: “Li dijî vê faşîzma ku her diçe zêde dibe, ji bo jinan ew çareya xwe ne. Em ji saziyên jinan jî piştgiriyê dipên.”

http://jinnews.com.tr/kr