Turkish
English
Li ser banga Defend Rojava (Rojava biparêze) pêr ji Awusturalyayê heta bi Kanadayê, li gelek welatên dinyayê û nexasim jî Ewrûpayê, bi sed hezaran kesî êrişên qirkirinê yên dewleta Tirk şermezar kirin. Çalakgeran xwest êriş bên rawestandin, sûcên dewleta Tirk û çeteyên wê bêîn eşkerekirin û dewleta Tirk ji deverên wê dagirkirî bê derxistin.
Çalakiyên herî girseyî li Ewrûpayî bûn, li payextên mîna Berlîn, Londonê, lê her wiha bajarên mîna Kolnê jî bi dehhezaran mirov daketin meydanan.
Berlîn: Bi deh hezaran kes ji bo Rojava daketin meydanan û dewleta Tirk protesto kirin. Çalakger li Meydana Potsdamer Platzê civiyan. Fermandara QSD’ê û Berdevka YPJ’ê Nesrîn Ebdullah bi rêya telefonê got, “Şervan û gel, şerê man û nemanê dikin. Gel û şervanên me bi qehremanî li ber xwe didin. Em ê ti carî xiyanetê li gel, dost û mirovayetiyê nekin. Erdogan wê negihêje armanca xwe.” Girse heta bi Meydana Brandenburger Torê meşiya.
Koln: Li bajarê Elmanyayê Kolnê bêhtirî 30 hezar kesî meşiyan. Nerazîbûna ji dagirkeriya Tirk kir ku hemû partiyên di meclîsa federal de jî bibin yek li Kolnê. Parlamenterên federal ên ji Kolnê hilbijartî Matthias W. Bikrwald (Die Linke), Katharina Dröge (Bundnis90/Die Grünen). Prof. Dr. Heribert Hirte (CDU), Rheinhard Houben (FDP), Prof. Dr. Karl Lauterbach (SPD), Sven Lehmann (Bundnis90/Die Grünen), Gisela Manderla (CDU), Dr. Roll Mützenich (SPD) û Karsten Möring (CDU) jî destek da meşê.
Beriya meşê parlamener Bikrwald, Hirte, Manderla û Berivan Aymaz, tevî Hevserokê TEV-DEM´ê Xerîb Hiso li meydana Clodwigê daxuyaniyeke hevpar da çapemeniyê û wan got, ew ê bi hev re li dijî komkujiyên dewleta Tirk bisekinin.
Li meydana Friesenplatzê parlamentera CDU´yê ya federal Gisela Manderla jî peyivî û got, li Rojava sivîlan, Kurdan dikujin û hikûmeta wê li dijî vê ye.
Wekî din li bajarên Elmanyayê Hamburg, Frankfurtê, li paytexta Ingilîstanê Londonê, li paytexta Fransayê Parîsê, li gelek bajarên Fransayê yên weke Toulousê jî çalakî hebûn.
Li bajarê Pîstoîa yê herêma Toskana ya Îtalyayê dostên Kurdan ji bo êrîşên dagirkeriyê yên dewleta Tirk şermezar bikin daketin meydanan.
Li bajarê Lehistanê Krakowê jî dostên Kurdan li meydanan bûn û wan jî êrişkariya dewleta Tirk şermezar kir.
Viyana: Li paytexta Awusturyayê çalakiyeke girseyî ya li dijî dagirkeriya dewleta Tirk hebû. Di çalakiyê de bang li hikûmeta Awusturyayê hat kirin ku bi lezgînî dawî li bazirganiya xwe ya çekan a bi Tirkiyeyê re bîne.
Li gelek bajarên din ên Awusturyayê jî çalakî hebûn û di nav van de a li Grazê gelekî qelebalix bû.
Goteborg: Li bajarê Swêdê Goteberogê Kurdistanî û dostên wan ji bo ku dagirkeriya Tirk a hov şermezar bikin, derketin meydanan. li Hedenê bi hezaran kes civiyan û ji bo qirkeriya Tirk a li ser Rojava bidawî bibe meş û mîtîngek kirin. Wekîla Partiya Çepgir Yasmîne Paiso Nilsson got, ji bo ku PKK ji nav lîsteya terorê were derxistin divê xebat bê kirin.
Li bajarên din ên Swêdê Stockholm, Malmo, Karstad û Umeayê jî dagirkeriya qirker a Tirk hat şermezarkrin.
Melbourne: Kurdistanî û dostên wan li bajarê Awusturalyayê Melbourneê li pêşiya Pirtûkxaneya Eyaletê hatin ba hev û êrişên dewleta Tirk a dagirker protestokirin.
Li bajarê Awusturalyayê Perthê jî dagirkeriya Tirk hate protestokirin.
Toronto: Kurdistaniyên li bajarê Toronto yê Kanadayê tevî dostên xwe li dijî êrîşên dagirkeriyê yên dewleta Tirk ên li dijî Bakur û Rojhilatê Sûriyeyê daketin meydanan.
Çalakger li ber avahiya parlamenê civiyan û xwestin dewleta Tirk ji ber sûcên şer û dagirkeriyê bê cezakirin.
